स्नोकर च्याम्पियनसीप शुरु

इटहरी/ दोस्रो पूर्वाञ्चलव्यापी स्नोकर च्याम्पियनसिप बिहीबारदेखि इटहरीमा शुरु भएको छ । प्रतियोगिता १ हप्तासम्म सञ्चालन हुने आयोजक सिटी हेल्थ क्लब एण्ड स्नोकर हाउस अफ कार्की ब्रदर्सले जनाएको छ ।

प्रतियोगितामा ५४ जना खेलाडीले प्रतिष्पर्धा गर्ने आयोजक संस्थाका श्याम कार्कीले बताए । यो संख्या अघिल्लो प्रतियोगिताको भन्दा बढी हो । कार्कीका अनुसार अघिल्लो प्रतियोगितामा ४४ जना खेलाडी सहभागी थिए । प्रतियोगिता बिहान ११ बजेदेखि बेलुका ७ बजेसम्म सञ्चालन हुने उनले बताए । प्रतियोगितामा इटहरीका साथै बिर्तामोड, दमक, धरान, विराटनगर र बेलबारीका खेलाडीले प्रतिष्पर्धा गरिरहेको कार्कीले बताए ।

उनका अनुसार प्रतियोगितामा पहिलो हुने खेलाडीले ४० हजार नगदका साथमा ट्रफी, प्रमाणपत्र र मेडल पाउनेछ भने दोस्रो हुनेले २० हजार नगदका साथमा ट्रफी, मेडल र प्रमाणपत्र पाउनेछ । क्वार्टर फाइनलमा पुग्ने ८ जना खेलाडीले पनि ५ हजार रुपैयाँ नगदका साथै ट्रफी, मेडल र प्रमाणपत्र पाउने कार्कीले जनाए ।

जुनियर खेलाडीको हौसला बढाउन ५० प्रतिशत कम दर्ता शुल्क लिएर खेल्ने अवसर दिइएको पनि उनले जानकारी दिए ।