सिरहामा ट्रकमा आगजनी

सिबेन्द्र रोहिता

सिरहा । जनमत पार्टीका कार्यकर्ताले सिरहामा पुनः एउटा ट्रकमा आगजनी गरेको छ ।

 

डा. सीके राउत नेतृत्वको जनमत पार्टीले ११ बूँदे माग राखी पूर्व पश्चिम राजमार्ग अनिश्चितकालका लागि बन्द गरेको घोषणा गरे पनि बन्दको उलंघन गरेको भन्दै आक्रोशित जनमतका कार्यकर्ताले पूर्व पश्चिम लोकमार्गअन्तर्गत मिर्चैया बतहा नदीको पुलमा ना ४ ख १००९ नम्बरको ट्रकमा आगजनी गरेका हुन् ।

 

यसअघि पनि जनमतका कार्यकर्ताले सिरहाको चोहर्वा र सप्तरीमा राजमार्गमै ट्रक जलाएको थियो । किसान आन्दोलन गरिरहेका जनमत पार्टीले पूर्वपश्चिम राजमार्ग अनिश्चितकालिन बन्दको घोषणा गरेको छ ।

 

चालकमाथि कुटपिट गरी गाडीमा आगजनी गरेकाले जनमत पार्टीकै कार्यकर्ताको संलग्नता रहेको हुनसक्ने प्रहरीको दावी छ । तर सो पार्टीका केन्द्रीय सदस्य निर्मल मण्डलले आगजनी कसले गरेको कुरा थाहा नभएको बताएका छन् ।